Aɣerbaz amenzu “Ḥellu Muḥmed Ameẓyan” n taddart n Ugni n Ufeqqus, deg tɣiwant n Bujimaɛ, ad yili di ttiɛad taggara n ddurt-a. Ad tili deg-s, tezrigt tis rebɛa n rreḥba n udlis i warrac deg taddart-agi. Asentel n tezrigt-agi tamaynut, yella-d akka : “Ad ɣreɣ akken ad imɣureɣ”.
Ass n lǧemɛa d ssebt 06-07/11/2020, imezdaɣ n taddart n Ugni n Ufeqqus neɣ imezdaɣ merra n Bujimeɛ, ad ilin di ttiɛad u deg yirebbi n yidles s umata d udlis s wuzzig. Di tezrigt-is tis ukkuẓet, yetturaǧu ad yli wahil d anesbaɣur, gar temsikniyin, isaragen, isikwan…atg. Am wakken daɣen, ara tettunefk tegnit i yimura yettarun i ugrud, i wakken ad ssenzen s ubuddu idlisen-nsen, s tutlayin-a yemgaraden (tamaziɣt, tafransist d taɛrabt). D imura i yetturaǧun ad d-rzun seg waṭas n tamiwin n lwilaya n Tizi Uzzu.
Yetturaǧu ad ttekkint wugar n 06 n tezrigin, i ixedmen timsikniyin s usenzi n yidlisen. Ad d-nedber gar-asent; La Pensée, Richa Elsam, Kaza, Dalimen, Chihab…atg. Ma gar yimura, i yetturaǧun ad xedmen asenzi s ubuddu, ad d-nebder gar-asen: Ḥsen Maric, Temzi Kahina, Kamel Benṭaḥa, rnu ɣur-s imura n temnaḍt-agi. Ma ɣef wahil, i d-yettwaheggan i lmend n tezrigt-a tamaynut, yetturaǧu ad d-yili ɣef teɣzi n sin wussan. Ass n lǧemɛa 06 unbir 2020, mbeɛd tulya tunṣibt n rreḥba-a, ad bdunt temsikniyin d yisenza s ubuddu. Ma ɣef 10h00, ad bdun yisikwan-a : tira d tfelsafit i yigerdan. Ɣer tmeddit n wass, ad d-yili usikew n tessnaggurt (Astronomie), s yin d ccna. Ma si 15h0 d tasawent, ad d-yili usarag ɣef udlis n ugrud.
Ass n ssebt 07 unbir 2020, ad d-yili umaru Kamel Benṭaḥa d inegbi n lḥerma, mbeɛd awal n yimsuddsen n temlilit taseklant d umaru Kamel Benṭaḥa. Ad bdun yisikwan-a : asuneɣ, taɣuri, timucuha, aseɣmi. Ma ɣef 11h00 n uzal, ad tesuzen talilt n tidukla-a “Imnar”, inerzufen s yiwet n tezlit n yidir. Ma ɣer tmeddit n wass, ad naf tettuɛeggen yiwet n tmezgunt i yigerdan “Tamacahut n tsekkurt” sɣur umaru n tesfift n wunuɣen “Tamacahut n tsekkurt”.
Deffir-s kan, ad d-yili usarag d Mass Benṭaha Kamel, ara d-yawin awal ɣef udlis n ugrud d tirmit-is netta di tira. D ashier i d-yettwaheggan sɣur snat n tddukkliwin tidelsanin “Imnar” d “Asurif” n tɣiwant n Bujimeɛ, s tallelt n tenmehla n yidles n Tizi Uzzu, ɣer tama n Useqqamu Aɣerfan n Lwilaya (APW) n Tizi Uzzu. Aseggas-a, yella-d ubeddel n uɣerbaz d taddart ideg ara d-tili rreḥba-a. Tlata-nni n tezrigin timenza, llant-d deg uɣerbaz amenzu “Addar Belɛid” yellan deg taddart n Uεfir, ma d aseggas-a, ad-tili deg uɣerbaz amenzu “Ḥallu Muḥend Ameẓyan” n Ugni n Ufeqqus.
Bɣan yimsuddsen n rreḥba-agi, ad ẓẓun tikti n udlis d tayri n tɣuri ɣer warrac imecṭaḥ, d asebɣes daɣen i yimura yettarun i tsuta-agi. Ma ɣer taggara, ad d-nesmekti belli, tazrigt tamezwarut n rreḥba-a, tella-d deg 2016. Ma d tis snat, tella-d deg useggas n 2018, ɣer tama n tinna n yilindi (2019), i d-yellan d tis tlata.
Adaoun Abdelghani