Ulac ass ara d-ilalen mebla ma tufiḍ kra umagrad deg uɣmis “Echorouk”, i d-yekkaten s teqseḥ di tmurt n Leqbayel. Ad as-tiniḍ d tamurt n Leqbayel i d ccɣel-nsen imi i tt-ddan fell-as… Asentel i d-yettuɣalen yal tikelt d ddin amasiḥi ; nwan s wanect-a ara sembbiwlen iḥulfan n yimdanen. Ineɣmasen n uɣmis-a i yettnadin kan ɣef texnanasin i yettilin di tmetti akken ad tent-id-rren di La Une, ttun ur asen-d-nnin ara i Yizzayriyen ansi i d-tekken yidrimen i yessulin aɣmis-a ; imi ilul-d ssbeḥ,; tameddit yesεa claɣem ! Ttun ur d-nnin ara anwi yellan deffir uɣmis-a, imi ḥaca les vidéos n yirebraben ara tafeḍ di lsit-nni nsen : acḥal n wussan i teqqim la vidéo n GSPC i d-yesskanen amek i as-gezmen aqerru-s i yiwen n uεessas n lḥebs n Tizi Wezzu. Hattan akka tura tugniwin n Hassan Hatab ur ṭṭixirent ara din.
Acu kan akken i as-yenna winna : « Ma zegden lehdur armi tteklen… ». D ssaḥ,; afus n tallelt yekka-asen-d s ufella, nutni sseqdacen-ten kan d aεekkaz n umeksa. Abrid yeldi-asen-t-id uneɣlaf n ddin i icebban inğiliyen ɣer yirebraben. Zik qqaren-d d Fransa i tt-id-yessekkaren di tmurt n Leqbayel, netta yerna-d tura Marikan. Imi, εlaḥsab n wayen i d-yenna, syin i d-tekka taluft-a u ilaq ad tt-qablen s ssfa, ɣef wakken i d-yessawel. « Imḍembbren n tneɣlaft n ddin ad d-ttheggayen yiwen n wahil i ttrebga n yilmeẓyen-agi n tmurt n Leqbayel » d wa i d awal i d-yenna uneɣlaf-agi deg yiwet n temlilit netta d yineɣmasen. Acu kan waqila yettu ilmeẓyen-a sεan imawlan i ten-yettrebbin ɣef kra n leεwayed. Leεwayed ɣef wacu ur zmiren ara ad rekkḍen : tturebban ɣef uqader n yal ddin, ɣef tlelli n yal yiwen, ɣef tugdud di tmetti. Cwiṭ-nni trugza mazal-it.
Ula d netta ad tafeḍ d aεekkaz umeksa mi ara tettwaliḍ acḥal n tmura n usamer alemmas i yesseftayen tadrimt di tmurt n Lezzayer. Kemmel-itt kan kan d asawen tura kečč,; akken i as-yenna Muḥya.
Lhocine Ourezki