Yal tallit-a n ulqaḍ d ubray n uzemmur, yettnekkar-d yiwen n unezgum d ameqqran ɣer wat lmaɛesrat n uzemmur deg ukuẓet n tɣemmar n tmurt. Mi ara yettwajmeɛ dayen zzit sɣur yimsaɣen, yetteggra-d bu lmaɛesra deg leḥsabat imeqqranen i as-d-yesnulfuyen iɣilifen. Ssebba n waya d iɣes n uzemmur i d-yettɣiman d taffa sdat lmaɛesra-s mi ara yekfu ubray. Ur as-d-banen waṭas n yiberdan ɣef wamek ara as-yexdem akken ur yettḍurru tawennaḍt, ur irennu iman-is. Ladɣa imi, ilaq ad d-nesmekti, diri-t ayendin yiɣes-a i wakal d wanda yakk llant ṭṭjur. Seg wakken yesɛa kra n tangiwin tisemmamin, ansi yekka yiɣes-a n uzemmur ad yesreɣ, ad yeǧǧ ayen iḥuza ur yesliḥ i kra. Daymi ur ilaq uḍegger-ines anda i d-yewwi Rebbi kan. D ugur ageɛmir i d-ibanen tallit-a taneggarut, urɛad i as-d-ttwawfent tifrat iwulen, ama sɣur medden neɣ sɣur yinesdabuyen. Neẓra at zik ur d-mugren aɣbel-a, acku ma ur t-serɣen deg ukanun deg tsemhuyt n tegrest, llan xeddmen-t d leɣbar i tbeḥyar. Maca tura mi iɛum lgaz, ulac ikanunen. Mi ttzident tnezduɣin, ulac tbeḥyar. « Nella ntessra-as aṭas iɣes-a n uzemmur. Aha i useḥmu neɣ i leɣbar. Maca tura aseḥmu nesseqdac lgaz, ma d tibeḥyar ur nxeddem imerjaɛ igeɛmura am zik ». I d-tenna yiwet n tmeṭṭut seg Ayt Smaɛel. Ɣer kra n yimussnawen n taɣult, ala allus (recyclage) n yiɣes i ttwalin d ferru i d-yeggran i uɣilif. Ladɣa imi ar tura mačči aṭas i t-iɛerḍen, neɣ xilla n luzinat i yellan, akken ad d-ibin ugemmuḍ-is ma yettsuddu neɣ ala.
M. K.