Yir lexbar id-yaγlin am siεqa, tasebḥit n wass n lğemεa 09 tuber 2015. Agerruj n tẓuri n teqbaylit irruḥ, taftilt yeḍwin tizlit d yidles aqbayli texsi, wagi d acennay Meẓyan Racid, taεwint n tẓuri ideg uggmen wid yeffuden, i yeswen wid icaḍen taqbaylit. Yemmut di sbiṭar n (Parnet) di Lezzayer tamanaγt mbaεd aṭan it-yeṭfen γef teγzi n wacḥal n yiseggasen.
Meẓyan Racid, d timkarḍit n umaṭṭaf wis ssin di rradyu taγelnawt n teqbaylit, yejmaε deqs n yiḍebsiyen n tezlatin n teqbaylit s isental yemgaraden akked tsawar n yinaẓuren, illul ass n 27 furar 1944 di tama n (La Casbah) Lezzayer tamaneγt, aẓar-is n tmurt n leqbayel, imi mawlan-is n taddert n At-Yaḥya tamnaḍt n uzeffun. Meẓyan Racid issem-is aḥeqqani Mḥamed Yala, yettewreba-d deg irebbi n yinaẓẓuren meqren, syen yefka tamusni-s iwid yettnadin fell-as, yesselqem-d acḥal d axalaf. Yura deqs n yeḍrisen i icennayen meqren n teqbaylit, s yisental yemgaraden, am « Ssendu » i yecna ucennay Yidir, ak-weṣṣiγ a mmi Σzizen » i tecna Newara, « Lmaḥna-w » i yecna Qasi Abjawi, « Aḥeddad n At-Yanni » i yecna Sami el Ğazzayri, « Faḍma n Sumer » i tecna terbaεt Tagrewla.
Tamedyazt n Meẓyan Racid d tazedgant u d talqayant, yeṭṭef-d afus i tmedyazt taqbaylit di tsuta yezrin, yeṣṣaweḍ-itt-id i tsutiwin i d-iteddun, yerna deg ubrid hrawen. Si tama niḍen, Meẓyan Racid yessufeγ-d tidwilin di radyu taγelnawt n teqbaylit, ger-asent « Iγennayen n Uzekka » akked Crif Xeddam, « Rreḥba n Ssuq, « Aγerbal Imcarcar », « Ssbaḥ Lxir » akked Ben Muḥammed akked tedwilt « Lkar N Tizi N Tlata ». Deqs n tejmilin is-yuγalen di tudert-is deg yiseggasen-agi ineggura, am wesqamu unnig n timmuzγa, Rradyu d Tiliẓri taγelnawt. Meẓyan Racid yettawḍel di tmeqbart n Lεalya di Lezzayer tamanaγt di laεmer-is 71 n yiseggasen, s leḥdur n twacult n tẓuri d yedles n teqbaylit d Lezzayer sumata.
Islam Bessaci