Youcef YEFSAH d amjahed u d netta i d-yewwi tikti n lǧameɛ-agi asmi yella d aselway n tɣiwant n Tizi Rached. Xas akken yemmuger-d aṭas n wuguren fell-as, meɛna ur yebri ara i ṭṭbel deg waman. Yedder armi iwala asenfar-is yemmed. Nemmlal-it deg taddart-is, Tala Amara, newwi-d awal ɣef yiɛewwiqen i yesɛa asmi i bennun lǧameɛ-agi d wayen akk i as-d-xelqen imi yugi ad yeḥbes lebni-nni s yizamulen imaziɣen.
Aɣqmis n Yimaziɣen : amek i ak-d-tusa tikti n lebni n lǧameɛ-agi ?
Youcef YEFSAH : ɛeddaɣ-d seg Hydra deg Lezzayer tamaneɣt, walaɣ yiwen n lǧameɣ yebna s yizamulen-agi n tmaziɣt dɣa, nniɣ-as i wacuɣer ur nxeddem ara yiwen am wagi deg taddart-nneɣ. Din din, nudaɣ ɣef win i t-yebnan, Mass Chabane Dahmane, wwiɣ-t-id ɣer taddart i wakken ad aɣ-yebnu yiwen am winna. Ha-t-an, ihi, amek i d-tusa tikti-agi.
Asmi i t-tbennum, tesɛiḍ uguren.
Youcef YEFSAH : lǧameɛ-agi d asenfar gar waṭas n yisenfaren i xedmeɣ i taddart n Tala Amara asmi lliɣ d aselway n tɣiwant n Tizi Rached. Tella taddart, ulac d acu i tesɛa : la abrid wala ayen-nniḍen. Ihi, deg 4 n yiseggasen i sɛeddaɣ deg tɣiwant, bɣiɣ ad xedmeɣ aṭas n lecɣal i tɣiwant n Tizi Rached s umata.
Lebni n lǧameɛ yettwaḥbes kra n yiseggasen akken, acu n sebba ?
Youcef YEFSAH : yettwaḥbes asmi i yi-wwin ɣer lḥebs. Selkeɣ kan 4 n yiseggasen n tselwayt, wwin-iyi ɣer lḥebs. Sɛeddaɣ-d 13 n wagguren, ffɣeɣ-d : l’amnistie n Chadli. Teqqim akken teswiɛt temmenḍar kra n yiseggasen armi d asmi i d-kkreɣ, nniɣ i yimezdaɣ n taddart ilaq ad d-nexleq taseqqamut n taddart. Nexleq-itt-id, dɣa ikemmel lebni n lǧameɛ-nni.
Llan wid yugin udem i as-tefkam i lǧameɛ-nni ?
Youcef YEFSAH : llan wid i d-yennan d lǧameɛ n yiṛumyen ara tbennum. Xelqen-d ula d taseqqamut n lwilaya, tusa-d ad twali amek ara t-thudd. Nnejmaɛen i wakken ad d-afen ttawil isehlen i uhuddu-ines. Acu kan ur ṣsawḍen ara imi i asen-lliɣ d axsim. Akka i nessaweḍ ɣer taggara n lebni n lǧameɛ.
Hocine.M