Akken ur d-neqqar ara ɣef uɣrum. Maca taggara-ya deg yidurar n Tmurt n Yezwawen, am Ayt Smaɛel, ladɣa deg teswiɛt-a n yideflawen ed yigeffuren yezrin, wid i d-yeskarayen lmal ur ttaǧǧan amḍiq s uḥebber akken ad d-uǧwen tabaliwt n lqerḍ, n ujilban, n uẓekkun neɣ n walim, d ayen ara ččen yiɣersiwen-nsen deg usemmiḍ yessenzafen am win n wussan iɛeddan.
Am tnezzayt am tmeddit, am umecṭuḥ am umeqqran, kra n win yesɛan deg ugerbi-yis ixef ijewwa seg laẓ, yettwali ansi ara as-d-yaɣ imɣi-ya yeqquren yeẓḍan bac ad ten-yessusem. Maca, deg nnuba-ya, banen-d sin n wuguren: yiwen d tuqin (rareté) n tuga-ya i yeɛzizen ɣef lmal, wayeḍ d taɣlayt n ssuma n tbaliwin-a ɣur wid i tent-yesɛan.
Meḥsub, bab n lmal neɣ n wulli ad yewt ass imed netta yettqellib ɣef tgella n wid ileḥḥun ɣef ukuẓ n yiḍaren, alama yufa, ad t-id-iqubel ugur-nniḍen ; win n ssuma i ur tezmireḍ ad tqerrbeḍ, i yettawaḍen tikwal alami d 1200 n yidinaren i yiwet n tbaliwt.
« Akken xedmeɣ ḥesleɣ, ma ur uɣaɣ ara ad mtent wulli-yiw, ma uɣeɣ d tuqqda akka ɛinani ». Akka i aɣ-d-tenna yiwet n temɣart i iḥaren acu ara texdem deg tegnit am tin i tt-yeṭṭfen. Ma d yiwen seg wid yeznuzuyen leḥcic-a yekkawen yenna-aɣ-d: « Nekk tibaliwin-iw muggent ula s ujilban ed uẓekkun, ɣef waya teɣlay ssuma. Rnu, ur ilaq ad nettu dakken aql-aɣ deg tegrest ».
Akken yebɣu yili ihi, wid yesɛan lmal ttuḥettmen ad aɣen tabaliwt swayes ara ten-ɛelfen. Yal ass ad twaliḍ amdan-a neɣ d wa yettawi tabaliwt ladɣa sɣur at taddart, imi seg ssuq, aṭas i yettwalin dakken ur d asenf yelhan i ara d-tawiḍ syinna.
Mhenni Xalifi